Ang Muling Paglipad ni Darna

isinulat ni enzo

Muli na namang lumipad si Darna. Pero this time, si Narda ay hindi na si Angel Locsin - kundi si Marian Rivera na. Iisipin mo, bakit nga ba kailangang muling lumipad ni Darna sa telebisyon?

May taglay na kapangyarihan ang mga Pilipinong manonoood na manipulahin ang telebisyon. Kung ano at sino ang gusto nila, iyon ang ibibigay sa kanila. Para tangkilikin (trends, ratings, etc..), hahanapin ng telebisyon ang kiliti at layaw ng mga viewers at ito ang ibibigay niya.

Naging matagumpay ang naunang paglipad ni Angel Locsin bilang si Darna. Mula simula hanggang wakas ng serye ay mataas ang naging ratings nito. Tunay ngang tinutukan ng mga Pilipinong manonood ang paglunok ng bato ni Narda.

Sa kaniyang muling paglipad ngayon, si Marian Rivera ay ang bago ng Darna. Tatanungin mo, ano pa nga bang misteryong bumabalot kay Narda man o Darna ang hindi pa natin natutuklasan? Sino pa bang halimaw o cyborg ang hindi niya nakakalaban at napapataob?

Malawak ang buhay ni Darna. Sa teleserye, na umaabot ng ilang buwan sa telebisyon, ay tunay ngang magandang gawing sentro ng kwento si Darna. Dahil sa tagal ng itatakbo ng serye ay napakadali ng bigyan siya ng isangdaang kalaban - halimaw man, impakto o alien - upang tumakbo ang kwento at araw.

Pero madalas, katulad pa ng iba pang teleserye, dahil sa tagal at haba ay nasasakripisyo ang kalidad at saysay ng kwento. Kung minsan ay itsurang carnival na ang palabas. Magugulat ka: Si Darna ay marunong din palang mag-magic at circus.

Sa nakaraang paglipad ni Darna, ano nga ba ang mga aral na naiwan nya sa atin? Natatandaan mo pa ba ang kanyang mga pangarap at pighati? Ang kanyang pag-ibig at mga sakripisyo?

O ang tanging naaalala mo na lang ay ang kanyang seksing kasuotan, si Angel Locsin at ang mataas na ratings.